पर्यटक भिसामा खाडी र मलेशिया जाने कामदारमाथि कडाई गरेपछि तस्करहरुले अवैध बाटो प्रयोग गर्न थालेका छन् । भारत हुँदै दुबई पुगेका १२ महिला मंगलबार डिपोर्ट भएर काठमाडौं फर्केपछि मानव तस्करीको पछिल्लो कदम खुलेको हो । स्रोतका अनुसार दुबईमा मात्रै झण्डै एक सयको हाराहारीमा नेपाली महिलाहरु अलपत्र परेका छन् ।
ति सबै भारतको बाटो हुँदै ‘सेटिङ’मा दुबई पुगेका छन् । त्रिभुवन अन्तराष्ट्रिय विमानस्थलका एक अध्यागमन अधिकारीले भने, ‘काठमाडौंबाट जान कडाई गरेपछि अवैध बाटोको प्रयोग भएको देखिन्छ ।’
स्रोतका अनुसार भारतको बाटो हुँदै लगिएका महिलाहरुलाई दुबई ट्रान्जिट पारेर टिकट काटिएको देखिन्छ । तर मानव तस्करले त्यहीबाट घरेलु कामदारको रुपमा लैजाने योजना अनुसार काम भएको देखिन्छ ।
पर्यटक भिषामा जाने नेपाली महिला कामदारहरुलाई मानव तस्करहरुले बेच्ने र अलपत्र पार्ने क्रम बढेपछि काठमाडौंस्थित त्रिभुवन अन्तराष्ट्रिय विमानस्थलको अध्यागमन शाखाले कडाई गरेको थियो । स्रोतले भन्यो, ‘काठमाडौंमा कडाई भएपछि तस्करहरुले भारतका विभिन्न विमानस्थलहरुमा सेटिङ मिलाएको देखिन्छ ।’
Source: ekantipur.com
Leave a Reply